ഫ്രാന്സിയുടെ യാത്രകള് 1
======================
"ഹലോ റഹ്മാന് "
"യാ ഫ്രാന്സീ പറ "
" നീ നാളെ കാലിക്കറ്റ് പോവുന്നുണ്ടോ? "
"നിർബന്ധമില്ല, എന്നാലും നിന്റെ ആഗ്രഹമല്ലേ, നമുക്കു പോവാം .
"രാവിലെ നിന്നെ വന്നു പിക്ക് ചെയ്തോളാം "
" ഓ കെ. നീ ചുങ്കത്തറ വീട്ടിലേക്കു വരണം, ഞാന് ഭാര്യാവീട്ടിലാണ്, നിനക്കു വീടറിയില്ലേ? , നമുക്ക് എപ്പോഴാണ് പുറപ്പെടേണ്ടത്? "
"ഉം. . നമുക്കൊരു 8 മണിക്ക് പോവാം. എങ്കിലേ നിനക്ക് ടൗണിലെ തിരക്കു മനസിലാവൂ ".
" ഓ കെ. എന്നാല് നാളെ രാവിലെ കാണാം, ഗുഡ് നൈറ്റ്. "
" ഓ കെ. ഗുഡ് നൈറ്റ്. "
================= ================
" ദാ വരുന്നു "
റഹ്മാന് കാർ നിർത്താതെ ഹോണടിച്ചപ്പോൾ ഫ്രാന്സിസ് വിളിച്ചു പറഞ്ഞു.
"ഇത്ര ദൂരമൊന്നും ഇത് വരെ യാത്ര ചെയ്യാത്ത ആളാണ്, ശ്രദ്ധിക്കണം "
കാറിന്റെ ഡോര് തുറന്നു പിടിച്ചു പറഞ്ഞത് മേരിയാണ്.
ഫ്രാൻസിസിൻറെ ജീവിതചിത്രം തന്നെ മാറ്റി വരച്ച, അവനെപ്പോഴും പറയുന്ന, അവൻറെ സ്വന്തം ഭാര്യ.
"എന്നാ വേണ്ട മേരീ, ഞാന് കൊണ്ടു പോവുന്നില്ല "
റഹ്മാന് മറുപടി പറഞ്ഞു.
" ഹേയ് അതു കൊണ്ടല്ല. ഒരാഴ്ചയായി കാലിക്കറ്റ് പോവാനുള്ള തയാറെടുപ്പായിരുന്നു, വഴിയിലുള്ള സ്ഥലങ്ങള്, കാഴ്ചകള് എല്ലാം ബൈഹാർട്ടാക്കി വച്ചിട്ടുണ്ട്, "
"അത് കൊള്ളാമല്ലോ .
അപ്പോള് വഴി പിഴച്ചു പോവില്ല "
റഹ്മാന് ചിരിച്ചു കൊണ്ട് പറഞ്ഞു.
"അല്ലെങ്കിലും എനിക്കിതു വരെ വഴി പിഴച്ചതായി നിനക്കറിയാമോ? " ഫ്രാന്സിസ് ചോദിച്ചു .
അവന് മുൻ സീറ്റിലിരുന്നു ഡോറടച്ചു. മേരിയുടെ കൈ പിടിച്ചു.
"എന്നാല് ഞങ്ങള് പോയി വരാം മേരി "
"ശരി ഞാനിടക്ക് വിളിക്കാം " അവൾ കൈവീശി.
"ഭാര്യക്ക് ഒരു റ്റാറ്റാ കൊടുക്കെടാ ".
റഹ്മാന് കാർ മുന്നോട്ടെടുക്കുന്നതിനിടെ പറഞ്ഞു. ഫ്രാന്സിസ് ഒരു കൊച്ചു കുഞ്ഞിനെ പോലെ കൈകള് വീശി. സ്വന്തം കുഞ്ഞിനെ യാത്രയാക്കുന്നതു പോലെ മേരി കാർ കണ്ണില് നിന്നും മറയുന്നതു വരെ നോക്കി നിന്നു.
=================================
"ഇത് ഇന്നോവയാണല്ലേ " ?.
ഫ്രാൻസിസ് ചോദിച്ചു.
"അതേ നിനക്കെങ്ങനെ മനസിലായി. . ?"
റഹ്മാന് അത്ഭുതപ്പെട്ടു.
" ഇന്നോവ യുടെ ശബ്ദം എനിക്ക് തിരിച്ചറിയാം " "
"? "
"2007-2008 മോഡല് അല്ലെ . ? "
"അതൊക്കെ നിനക്കെങ്ങനെ അറിയാം ഫ്രാന്സീ "
" ഇതിലെ മ്യൂസിക് സിസ്റ്റം കണ്ടാലറിയാം.mp3യും കാസറ്റ് പ്ലയറും"
അവൻ മ്യൂസിക് പ്ലെയര് തടവിക്കൊണ്ടു പറഞ്ഞു.
" കൂളിംഗ് ഗ്ലാസ് വെക്കുന്നില്ലെ "?
റഹ്മാന് ചോദിച്ചു.
" ഓ ഞാനത് മറന്നു. ഗ്ലാസില്ലെങ്കിൽ ബോറാണല്ലേ " ?
അവൻ ഗ്ലാസെടുത്തു കണ്ണില് വച്ചു.
" എങ്ങനുണ്ട് ഗ്ലാമറല്ലേ , " ?.
" നീ അല്ലെങ്കിലും പണ്ടേ ഗ്ലാമറല്ലേ , തല അൽപം താഴ്ത്തി ഹെഡ് റെസ്റ്റിന് നേരെ വെക്ക് " .
"ഇപ്പൊഴൊ? "
അവൻ തല അൽപം താഴ്ത്തി ചോദിച്ചു.
" ഓ കെ ഇപ്പോഴൊരു ഫിലിം സ്റ്റാറിൻറെ ലുക്ക് ഉണ്ട്. ".
"വേറെ ഏതു വണ്ടിയുടെ യൊക്കെ ശബ്ദം തിരിച്ചറിയാം നിനക്ക്? ".
റഹ്മാന് ചോദിച്ചു.
" സ്ഥിര പരിചയമുള്ള എല്ലാ വണ്ടികളും, മേരിയുടെ സ്കൂട്ടര്, നിന്റെ ബൊലേറോ, ടീച്ചറുടെ സ്വിഫ്റ്റ്, മോൻറെ സ്കൂള് ബസ് അതൊക്കെ അറിയാം. "
"റഹ്മാന് "
" ആ പറ "
" നീയീ ഏസി ഓഫാക്കി ഗ്ലാസ് എല്ലാം ഒന്ന് താഴ്ത്തിയിടാമോ? " "
"തണുപ്പ് പ്രശ്നമാണോ? "
"ഹേയ് അതു കൊണ്ടല്ല. "
റഹ്മാന് ഗ്ലാസുകൾ താഴ്ത്തി.
" ഫോറസ്റ്റ് എത്തിയല്ലേ? "
ഫ്രാന്സിസ് ചോദിച്ചു.
" എങ്ങനെ മനസ്സിലായി? "
"നീ മുളയുടെ ശബ്ദം കേൾക്കുന്നില്ലേ ,
പക്ഷികള് കരയുന്ന ശബ്ദം. ".
"ശാന്തമായ ഈ തണുപ്പ്, "
"കാടിന്റെ സുഗന്ധം " .
അവൻ ദീർഘമായി ശ്വാസം ഉള്ളിലേക്കെടുത്തു.അവൻ കാട് നന്നായി ആസ്വദിക്കുന്നതായി റഹ്മാനു തോന്നി.
"എനിക്ക് സ്മെൽ ഒന്നും കിട്ടുന്നില്ലല്ലോ? " "
" എന്തു സ്മെൽ "?
" നീ പറഞ്ഞ കാടിന്റെ സുഗന്ധം "
"നിനക്ക് അനുഭവിക്കണോ ? "
"യാ "
" എന്നാൽ കാറു നിർത്ത് " .
"ഓ കെ ,
ഇനി കണ്ണടച്ച് പിടിക്ക്.
"കിളികളുടെ ശബ്ദം കേൾക്കുന്നുണ്ടോ". ?
റഹ്മാന് കണ്ണടച്ചു.
................
.............
.........................
.......
.
"അതെ , ശരിയാണ്,
ഇതാ കാടിന്റെ ശബ്ദം,
മരങ്ങളുടെ ശബ്ദം,
കിളികളുടെ കളകൂജനങ്ങൾ,
ദൈവമേ, . . "...................
"ശരിയാണ് കാടിനൊരു സുഗന്ധമുണ്ട്."
"സുഖകരമായ ഒരു തണുപ്പും. "
റഹ്മാന് അല്പസമയം അവയിലാണ്ടു പോയി. അനിർവചനീയമായ എന്തോ അനുഭൂതി .പറഞ്ഞറിയിക്കാനാവാത്ത ഒരു സന്തോഷം അവനനനുഭവപ്പെട്ടു.
" എത്ര തവണ ഞാനിതിലേ കടന്നു പോയി. "
" ഇത്ര മനോഹരമായി ഈ കാട് എനിക്കിതു വരെ തോന്നിയിട്ടില്ല. "
" കാട് കാണാന് മാത്രമല്ല, റഹ്മാന് "
" അനുഭവിച്ചറിയാനുള്ളതാണ്. "
"ഹൃദയം കൊണ്ട് "
"മനസു കൊണ്ട് "
" മുഴുവന് ശരീരം കൊണ്ട്. "
" എനിക്കൊരു സംശയം ഫ്രാന്സിസ്? " "
" കണ്ണു കാണാത്ത നിന്നെക്കാൾ അന്ധനായാണോ കണ്ണു കാണുന്ന ഞാന് ജീവിക്കുന്നതെന്ന് " ? .
" നീ കാണുന്നതൊന്നും ഞാന് കാണുന്നില്ലല്ലോ ഫ്രാന്സിസ് " .
" ഞാന് കാഴ്ചയില്ലാത്ത അന്ധൻ, നീ കാഴ്ചയുള്ള അന്ധൻ അങ്ങനെയാണോ? ഫ്രാൻസിസ് ചിരിച്ചു.
റഹ്മാന് കാർ മുന്നോട്ടെടുത്തു.
==================================
അന്ധനായ ഫ്രാന്സിയുടെ യാത്ര നിങ്ങള്ക്കിഷ്ടമാവുന്നുണ്ടോ സുഹൃത്തേ?
No comments:
Post a Comment